Җәй кояшының рәхәт җылысын сагынырга өлгергән халык әледән-әле күккә бага һәм сүзне әбиләр чуагы тирәсенә күчерә. Ярага тоз сипкәндәй, һава торышын әйтүчеләр дә быел әбиләр чуагы булмас ахры диләр. Бу юлларны язганда исә Мәскәү синоптиклары башкалага шимбә көнне көтелгән җылы көннәр килә дигән хәбәр салды.
Күңелне җылытып, күзләрне чылатырлык әбиләр чуагының бер генә елны да булмый калганы юк анысы. Ләкин табигатьне генә аңлап бетереп булмый әле монда. Миңа калса, җәе дә ярты-йорты гына булган елда һәр кояшлы көне Ходайның безгә биргән бүләге дип карарга, шуннан ләззәт алып калырга кирәктер. Чөнки чын-чынлап җылы җәйләрне сагыныр көннәребез алда әле, җәмәгать. Шул ук синоптиклар быелгы кыш иртә киләчәк һәм бик салкын булачак дип өркетәләр. Ышанмаслык та түгел шул: миләш агачларында кызыл тәлгәшләр бик күп. Монысы инде халык сынавы – миләш ишелеп уңган елны кыш суык килә.
